Қоғамдық қауіпсіздік пен тәртіп – өркениетті қоғамның басты тіректерінің бірі. Осы орайда Шымкент қаласы Полиция департаментінің бастамасымен, ағымдағы жылдың 4–14 тамызы аралығында “Таза қала” жедел-профилактикалық іс-шарасы ұйымдастырылуда. Аталған іс-шара Тұран ауданында да белсенді түрде жүзеге асырылуда.

Іс-шараның басты мақсаты – аудан аумағында құқық бұзушылықтардың алдын алу, қоғамдық тәртіпті сақтау және азаматтардың қауіпсіздігін қамтамасыз ету. Бұл бағытта Тұран аудандық Полиция басқармасы тарапынан кешенді жұмыстар қолға алынып отыр. Күнделікті қызмет барысында полиция қызметкерлері тұрғын үйлердің аулаларында, саябақтар мен демалыс орындарында, халық көп шоғырланатын аймақтарда рейдтік іс-шаралар өткізуде.

Профилактикалық шаралар аясында полиция қызметкерлері көшелер мен қоғамдық орындарды тексеріп, тәртіп бұзушылықтардың алдын алуға бағытталған түсіндіру жұмыстарын жүргізуде. Заңсыз әрекеттер мен қоғамға қауіпті қылықтардың жолын кесу – бұл шараның негізгі міндеттерінің бірі. Сонымен қатар, құқық қорғау органдары тұрғындардан келіп түскен арыз-шағымдарды жедел қарап, шешу жұмыстарын да қатар атқаруда.

“Таза қала” іс-шарасы аясында аудандағы заңсыз сауда нүктелері, рұқсат етілмеген жарнамалар мен қоқыс тастау деректері де назарға алынуда. Қаланың инфрақұрылымын қорғау, қоғамдық мүлікке ұқыптылықпен қарауға шақыру – осы кампанияның тағы бір маңызды бағыты.

Полиция басқармасы азаматтарды белсенділік танытуға және тәртіп бұзушылықтарға бейжай қарамауға шақырады. Қоғамдық тәртіпті сақтау – тек тәртіп сақшыларының ғана емес, әрбір азаматтың міндеті екенін ұмытпаған жөн. Қырағылық пен сергектік – өз қауіпсіздігіңнің кепілі.

Іс-шара барысында кейбір тұрғындар полиция қызметкерлерінің тексерулеріне тап болуы мүмкін. Бұл – заң аясында жүргізілетін жоспарлы жұмыстар екенін еске сала отырып, аудан тұрғындарынан түсіністік пен қолдау көрсетуді сұраймыз. Тәртіп бар жерде тыныштық бар. Ал тыныштық – өмір сапасының негізі.

Тұран ауданы – бүгінде Шымкенттің дамушы аймақтарының бірі. Мұнда жаңа тұрғын үй кешендері бой көтеріп, халық саны жылдан-жылға артып келеді. Осындай үлкен аумақта қоғамдық қауіпсіздікті қамтамасыз ету үшін полиция мен халық арасындағы өзара сенім мен түсіністік аса маңызды. Бұл – ортақ мүдде жолындағы бірлескен жауапкершілік.