Шымкент қаласының «Қаратау дәстүрлі өнер» мектебінде «Абай оқулары» атты қалалық байқаудың жеңімпаздарын марапаттау салтанаты өтті. Бұл іс-шараның негізгі мақсаты – Абай Құнанбайұлының шығармаларын насихаттап, жастардың әдебиетке қызығушылығын арттыру, сондай-ақ талантты оқушылар мен ұстаздарды қолдау. Байқау жастардың интеллектуалдық дамуында жаңа серпін беруді көздейді.

Биылғы жылы «Абай оқулары» байқауына 1-10 сынып оқушылары қатысып, жалпы саны 245 665 оқушы қамтылды. Бұл көрсеткіш байқаудың халық арасында танымалдылығының жоғары екенін көрсетеді. Байқау төрт кезеңнен – сыныпішілік, мектепішілік, аудандық және қалалық – тұрады. Осылайша, оқушылардың шығармашылық қабілеттері мен әдебиетке деген сүйіспеншілігі жан-жақты тексеріледі.

Марапаттау рәсімі барысында қала әкімінің орынбасары Сәрсен Құранбек жеңімпаздарды құттықтап, оларға қаржылай сыйлықтар табыс етті. Сәрсен Құранбек өз сөзінде: «Абайды оқыған бала нағыз патриот болып өседі. Сондықтан, бұл байқауды кеңінен насихаттауымыз керек. Болашақта балалардың көбірек қатысуын қамтамасыз ету басты назарда болуы тиіс» – деп атап өтті. Оның пікірінше, Абайдың шығармашылығын насихаттау – жастардың ұлттық құндылықтарға деген сүйіспеншілігін арттыруға үлкен септігін тигізеді.

Байқаудың демеушісі, «Al-Farabi Bilim» және “FinBridge International School” мектептерінің бас құрылтайшысы Есбол Қамбаров, жеңімпаз оқушылар мен олардың ұстаздарына қаржылай сертификаттар берді. Есбол Әуесбекұлының бұл қолдауы білім мен өнерді дамытуға бағытталған маңызды қадам ретінде бағаланды. Қала әкімінің орынбасары, өз кезегінде, дарынды жастарға қолдау көрсеткен демеушіге алғысын жеткізді.

Байқау барысында оқушылар Абайдың шығармаларын жатқа және мәнерлеп оқып, өнерлерін паш етті. Олардың шығармашылығы мен ынтасы көрермендер мен қазылар алқасын тәнті етті. Нәтижесінде, 21 оқушы қалалық кезеңнің жеңімпазы атанды. Бұл оқушылардың болашақта мәдениетіміз бен әдебиетіміздің дамуына зор үлес қосатынына сенім білдіреді.

«Абай оқулары» байқауы – жастардың рухани дамуына, әдебиетке деген қызығушылықты арттыруға, сондай-ақ, Абай Құнанбайұлының мұрасын сақтау мен насихаттауға бағытталған маңызды шара. Мұндай байқаулар еліміздің мәдениетінде, білім саласында зор әсер етіп, жас дарындарға жаңа мүмкіндіктер ашады.