Қазақстанда отандық дәрі-дәрмек өндірісін дамытуға бағытталған ауқымды жобалар кезең-кезеңімен жүзеге асып жатыр. Мемлекет басшысының тапсырмасына сәйкес, елдің фармацевтикалық қауіпсіздігін күшейту және импортқа тәуелділікті азайту мақсатында жаңа өндірістер ашуға басымдық берілуде.

 Осы бағыттағы маңызды жобалардың бірі Алматы облысында қолға алынбақ. ҚР Үкіметі Денсаулық сақтау министрлігі мен «Steppe pharmaceuticals» ЖШС арасында жасалған инвестициялық келісімді ресми түрде мақұлдады. Тиісті қаулыға Премьер-министр Olzhas Bektenov қол қойды.

 Жоба «Алатау» арнайы экономикалық аймағының аумағында іске асады. Мұнда толық циклді биофармацевтикалық кешен салу жоспарланған. Инвестицияның жалпы көлемі 32,5 миллиард теңгені құрайды.

 Жаңа зауыт жоғары технологиялы өндірісті дамытуға бағытталады. Кәсіпорында 20 түрлі дәрілік препарат шығару көзделген. Олардың ішінде онкологиялық дерттерді емдеуге арналған дәрілер, сирек кездесетін ауруларға қарсы препараттар және заманауи иммунобиологиялық өнімдер бар.

 Жоспар бойынша кәсіпорыс 2031 жылы іске қосылып, 2032 жылы толық өндірістік қуатқа шығуы тиіс. Ал негізгі бағыттар бойынша толық өндірістік циклге көшу 2034 жылға жоспарланған.

 Жоба тек дәрі өндірумен шектелмейді. Кешен базасында ғылыми-зерттеу және тәжірибелік-конструкторлық жұмыстар жүргізіледі. Сонымен қатар биоэквиваленттілік зерттеулері ұйымдастырылып, халықаралық GMP стандарттарын енгізу жоспарланып отыр.

 Болашақта кәсіпорын жанынан отандық мамандарды даярлау және олардың біліктілігін арттыру жүйесі де құрылмақ. Бұл еліміздегі фармацевтика саласының кадрлық әлеуетін күшейтуге мүмкіндік береді.

 Мамандардың айтуынша, жаңа кешен Қазақстанның дәрілік қауіпсіздігін арттырып қана қоймай, халықты сапалы әрі қолжетімді медициналық препараттармен қамтамасыз етуге ықпал етеді. Жоба аясында шамамен 60 жаңа жұмыс орны ашылады деп күтілуде.

 Қазіргі уақытта елімізде фармацевтика саласында сегіз ірі инвестициялық жоба жүзеге асырылып жатыр. Сала соңғы жылдары тұрақты өсім көрсетуде. Өткен жылдың қорытындысы бойынша отандық фармацевтикалық өнім өндірісінің көлемі 191,1 миллиард теңгеге жетіп, алдыңғы жылмен салыстырғанда 8,7 пайызға артқан. Ал салаға тартылған инвестиция көлемі 390 миллиард теңгеден асқан.

 Сарапшылардың пікірінше, Алматы облысында салынатын жаңа кешен Қазақстандағы фармацевтика өндірісінің дамуына серпін беріп, отандық дәрі-дәрмек үлесін арттыруға жол ашады.