2025 жылдың алғашқы жартыжылдығында Отырар ауданында тұрғындарды таза ауыз сумен қамтамасыз ету мәселесі басты назарда тұр. Аудан халқының тұрмыс сапасын арттырып, өмір сүру деңгейін жақсарту бағытында қолға алынған жұмыстардың бірі – ауылдық елдімекендерге сапалы ауыз су жеткізу. Осы мақсатта аудан әкімі Қайрат Жолдыбайұлы арнайы жұмыс сапарымен Балтакөл ауылдық округіне барып, онда атқарылып жатқан инженерлік инфрақұрылым жөніндегі жұмыстармен жан-жақты танысты.

Аудан әкімінің сапары Көлқұдық елді мекенінен басталды. Бұл ауылда ауыз су желілері мен ауыз су имаратына ағымдағы жөндеу жұмыстары жүріп жатыр. Ағымдағы жылы осы мақсатқа бюджеттен 13 миллион теңге көлемінде қаражат бөлінген. Бұл қаражатқа ауыз су ұңғымасындағы сүзгілер мен құдықшалар, есептегіш құрылғылар, сондай-ақ ескірген су құбырлары мен тозығы жеткен су сору құрылғыларын (насостар) ауыстыру көзделген.

Аудан басшысы жөндеу жұмыстарының барысын өз көзімен көріп, мердігер ұйым мен жауапты сала мамандарына нақты тапсырмалар жүктеді. Ол барлық жұмыс бекітілген кестеге сәйкес әрі сапалы орындалуы қажет екенін баса айтты. Жөндеу сапасы мен уақтылы орындалуы — тұрғындардың таза әрі үздіксіз ауыз суға қол жеткізуінің кепілі екенін алға тартты.

Көлқұдықтан кейін Қайрат Жолдыбайұлы Балтакөл елді мекеніндегі ауыз су желілері мен имараттарын қайта құру жұмыстарын бақылап шықты. Бұл жоба аясында ауылда 48 280 метр ауыз су желісі жаңартылып жатыр. Сонымен қатар, ауыл тұрғындарын үздіксіз таза ауыз сумен қамтамасыз ету үшін заманауи су тарату инфрақұрылымдарын орнату да көзделген.

Балтакөлмен қатар Ақкөл ауылында да ауқымды жұмыстар қолға алынған. Мұнда жалпы ұзындығы 11 560 метр болатын ауыз су жүйесін жүргізу басталып кеткен. Қазіргі таңда бұл екі елді мекенде де құрылыс-монтаж жұмыстары қарқынды жүріп жатыр. Жауапты мердігер ұйымдар бекітілген мерзім мен талаптарға сай әрекет етуде. Бұл туралы нысандарды аралау кезінде мердігер мекеме өкілдері аудан әкіміне мәлім етті.

Сапар соңында Қайрат Жолдыбайұлы бұл нысандардың ауыл тұрғындары үшін әлеуметтік маңызы аса жоғары екенін атап өтті. Ол инфрақұрылымдық жобалардың тек қағаз жүзінде емес, шынайы нәтижелер беруі қажеттігін айтып, мердігер компанияларға және жауапты сала мамандарына жұмыстың сапасы мен уақытында аяқталуын қатаң бақылауда ұстау туралы нақты тапсырмалар берді.

Аудан әкімінің айтуынша, ауыз сумен қамтамасыз ету – ауданның ұзақ мерзімді әлеуметтік-экономикалық дамуына тікелей әсер ететін маңызды фактор. Халықтың денсаулығы, ауыл шаруашылығының өнімділігі, санитарлық жағдай – барлығы осы жүйенің тұрақты жұмыс істеуіне байланысты.

Ауыз су жүйелерін жөндеу мен жаңғырту — бір күндік іс емес. Аудан әкімдігі тарапынан бұл жұмыстарға жүйелі түрде мониторинг жүргізіліп отырады. Әрбір құрылыс нысаны бойынша сапа, мерзім, техника қауіпсіздігі және тиімділік мәселелері бойынша кешенді бағалау жасалады.

Мәселен, Көлқұдықтағы сүзгі жүйесін ауыстыру, су есептегіш құрылғыларын орнату — тек сумен жабдықтау процесінің ғана емес, жалпы тұтыну көлемін әділ бақылауға мүмкіндік беретін фактор. Бұл — бюджет қаржысының тиімді игерілуі мен ысырапты болдырмаудың жолы.

Сонымен қатар, Ақкөл ауылындағы жобада жаңа технологиялар енгізілуде. Құрылыс барысында заманауи, су шығынын үнемдейтін, ұзақмерзімділігі жоғары құбырлар пайдаланылуда. Бұл өз кезегінде жер асты суларының деңгейін тұрақтандыруға да оң әсер етеді.

Су – тіршілік нәрі. Ал таза ауыз суға қол жеткізу – ел дамуының негізгі көрсеткіштерінің бірі. Отырар ауданында атқарылып жатқан бұл жұмыстар – тек инфрақұрылымды жақсарту емес, сонымен бірге өңір халқының әлеуметтік әл-ауқатын арттыруға бағытталған игі қадам. Жұмыстар сәтті әрі сапалы аяқталса, бірнеше ауылдың тұрғындары көп жылдан бері шешілмей келе жатқан ауыз су мәселесінен арылмақ.

Осы ретте аудан әкімінің тікелей араласуы, әрбір нысанды өзі аралап, жұмыстың барысымен танысуы – билік пен халық арасындағы сенімді нығайтуға да оң ықпал етеді. Халықтың сенімі мен қолдауы – барлық істің табысты болуына берік негіз.

Отырар ауданындағы ауыз су инфрақұрылымын жаңғырту жұмыстары – тек ағымдағы жылдың жоспары ғана емес, стратегиялық маңызды мәселе. Бүгінгі таңда Көлқұдық, Балтакөл және Ақкөл елді мекендерінде ауыз су жүйелерін жөндеу, жаңарту және жаңадан тарту жұмыстары қызу жүріп жатыр. Бұл жобалар аяқталғаннан кейін мыңдаған тұрғындар таза, сапалы және үздіксіз ауыз сумен қамтамасыз етілетін болады. Мұндай жүйелі жұмыстардың өз жемісін беретіні сөзсіз.