Шымкент қаласында Тәжікстан Республикасының денсаулық сақтау саласының өкілдері арнайы сапармен келіп, қаладағы медициналық мекемелер мен мектептердегі егу кабинеттерінің жұмысымен танысып, адам папиллома вирусына (АПВ) қарсы вакцинациялауды енгізу бойынша тәжірибе алмасты. Бұл шара Дүниежүзілік денсаулық сақтау ұйымының қолдауымен ұйымдастырылды және оның мақсаты – Тәжікстан Республикасында АПВ вакцинациясын енгізу бойынша қажетті білім мен тәжірибе жинақтау болды.

Шет елден келген қонақтар Шымкенттің медициналық ұйымдары мен мектептеріндегі вакцинациялау процесімен танысып, Қазақстанның тәжірибесін зерттеді. Бұл іс-шара барысында Тәжікстандық денсаулық сақтау мамандары иммундау бағдарламаларын енгізу және халық арасында вакцинация туралы түсінік беру бойынша тәжірибе жинақтады. АПВ вакцинациясы адам папиллома вирусының (АПВ) алдын алу шарасы болып табылады, оның пайда болуымен жатыр мойны обыры, сондай-ақ басқа да онкологиялық аурулар өршиді.

Тәжікстандағы иммунопрофилактика орталығының бас директоры Файзали Барот өз сөзінде Қазақстанның денсаулық сақтау жүйесіне жоғары баға беріп, еліміздің тәжірибесін өз елдерінде қолдану ниетін білдірді. Ол, сондай-ақ, Тәжікстанның 2025 жылдан бастап адам папиллома вирусына қарсы вакцинацияны енгізуге дайындалып жатқанын айтты. «Біз Қазақстанға әріптестеріміздің тәжірибесін қабылдау және осы вакцинацияны Тәжікстанда енгізу үшін келдік. Қазақстанның денсаулық сақтау саласындағы тәжірибесі өте жоғары, және осы білімнің арқасында біз өзіміздің жүйемізді жақсартуға тырысамыз», – деп атап өтті Файзали Барот.

Шымкентте өтіп жатқан тәжірибе алмасу шарасы Дүниежүзілік денсаулық сақтау ұйымы мен Қазақстан Республикасының Денсаулық сақтау министрлігі, сондай-ақ Шымкент қаласы мен Түркістан облысы денсаулық сақтау басқармаларының ұйымдастыруымен жүзеге асуда. Іс-шара 8-қарашаға дейін жалғасып, қатысушыларға вакцинаның маңызы мен оның енгізілу тәртібі жайлы толыққанды ақпарат берілуде.

Қазақстанда адам папиллома вирусына қарсы вакцинациялау науқаны белсенді түрде жүріп жатыр. Шымкент қаласында 12-18 жас аралығындағы қыздарды вакцинациялау жұмыстары толыққанды жүргізілуде. Жоспар бойынша, 50%-дан астам жасөспірім қыздар вакцинаны қабылдаған. Бұл көрсеткіш еліміз бойынша ең жоғары деңгейде және республикадағы басқа өңірлердің алдында тұр. Қалада вакцинациядан кейін жағымсыз жағдайлардың тіркелмегені де ерекше атап өтілуде.

Шымкентте жүргізілген вакцинация жұмыстары тек жергілікті тұрғындарды ғана емес, сонымен қатар шетелдік мамандар үшін де үлгі болып табылады. Мұндағы денсаулық сақтау ұйымдары мен мектептердегі егу кабинеттері жақсы ұйымдастырылған және халыққа қызмет көрсету сапасы жоғары. Шымкент қаласының үлгісі Тәжікстанға тек вакцинацияның өзіне ғана емес, сондай-ақ осы процесті тиімді ұйымдастыруға қатысты да маңызды тәжірибе ұсынады.

Бұл халықаралық шара медициналық мекемелер арасындағы ынтымақтастықты нығайтып, өңірлер арасындағы білім алмасу мен тәжірибе бөлісудің маңыздылығын көрсетті. Сонымен қатар, АПВ вакцинациясын енгізу денсаулық сақтау жүйесін нығайтып, онкологиялық аурулардың алдын алуға бағытталған маңызды қадам болып табылады.

Айта кетейік, Дүниежүзілік денсаулық сақтау ұйымының және басқа да халықаралық ұйымдардың қолдауымен Қазақстанда жыл сайын бірнеше ірі шаралар өткізіліп, әртүрлі денсаулық сақтау саласындағы өзекті мәселелер бойынша тәжірибе алмасу жұмыстары жүргізілуде. Мұндай іс-шаралар, әсіресе, вакциналау саласында, елдер арасындағы ынтымақтастықты нығайтуға және халықтың денсаулығын жақсартуға үлкен септігін тигізеді.