ҚР Ғылым және жоғары білім министрлігі 2026-2027 оқу жылына арналған мемлекеттік білім беру гранттары иегерлерінің тізімін жариялады. Биыл 75 мыңнан астам талапкер еліміздің жоғары оқу орындарында тегін білім алу мүмкіндігіне ие болды.

Министрліктің мәліметінше, мемлекеттік білім беру тапсырысы экономиканың болашақтағы кадрлық қажеттіліктерін ескере отырып қалыптастырылған. Мемлекет басшысының тапсырмасына сәйкес, гранттардың 60 пайызы елдің индустриялық және технологиялық дамуы үшін маңызды инженерлік және техникалық бағыттарға бөлінді.

Сонымен қатар өңірлерді білікті мамандармен қамтамасыз етуге ерекше назар аударылды. «Серпін» жобасы аясында екі мыңнан астам талапкер Солтүстік, Шығыс және Орталық Қазақстандағы жоғары оқу орындарында білім алады.

Ғылым және жоғары білім министрлігінің хабарлауынша, мемлекеттік грант – жастарға сапалы білім алуға мүмкіндік беретін маңызды қолдау тетігі. Биыл грант иегерлерінің саны 75 мыңнан асты. Конкурсты өткізу тәртібі өзгеріссіз сақталып, оның ашықтығы мен әділдігін қамтамасыз етуге бағытталған шаралар жалғастырылды.

Бұған қоса, қазақстандық жастар үшін халықаралық білім алу мүмкіндіктері де кеңейіп келеді. Елімізде жұмыс істейтін шетелдік жоғары оқу орындары мен олардың филиалдарында білім алу үшін де мемлекеттік гранттар қарастырылған. Бұл әлемдік деңгейдегі білімге қолжетімділікті арттыруға мүмкіндік береді.

2026 жылы мемлекеттік білім беру гранттарын тағайындау конкурсына шамамен 127 мың өтініш келіп түскен. Бұл өткен жылмен салыстырғанда 14 мыңға көп. Көрсеткіш жоғары білім алуға деген сұраныстың артып келе жатқанын көрсетеді.

Гранттарды бөлу кезінде заңнамада қарастырылған барлық жеңілдіктер мен қолдау шаралары сақталды. Атап айтқанда, әлеуметтік осал топтарға арналған квоталар, халықаралық олимпиадалар мен ірі спорттық жарыстар жеңімпаздарына берілетін конкурстан тыс гранттар, сондай-ақ мерзімді әскери қызметін өтеген азаматтарға арналған 1816 грант қарастырылды.

Мемлекеттік білім беру гранты иегерлерінің тізімімен ҚР Ғылым және жоғары білім министрлігінің ресми ақпараттық ресурстарынан танысуға болады.

Грант туралы электрондық куәліктер үш жұмыс күні ішінде ҚР ҒЖБМ Ұлттық тестілеу орталығының grant.testcenter.kz платформасында қолжетімді болады. Ал жоғары оқу орындарына құжат қабылдау 25 тамызды қоса алғанға дейін жалғасады.