Словакия астанасы Братиславада өтіп жатқан 20 жасқа дейінгі балуандар арасындағы әлем чемпионатында Қазақстан құрамасы үшін маңызды нәтиже тіркелді. 92 келіге дейінгі салмақта ел намысын қорғаған Бейбарыс Ерғали жартылай финалға өтті. Жарыс 16-23 тамыз аралығында ұйымдастырылып жатыр. Қазақстандық балуан татамиге екі рет шығып, екі кездесуде де жеңіске жетті. Алғашқы белдесуінде Бейбарыс швейцариялық Яцек Адам Фудалешпен күш сынасты. Қазақстандық спортшы қарсыласынан айқын басым түсіп, кездесуді 9:2 есебімен аяқтады. Ширек финалда Ерғали украиналық Егор Хорохпен кездесті. Негізгі уақыт 3:3 есебімен тең аяқталғанымен, жеңіс қазақстандық балуанға бұйырды. Себебі белдесудің соңғы белсенді әрекетін Бейбарыс жасаған. Осылайша ол қосымша көрсеткіш бойынша қарсыласынан басым түсіп, әлем чемпионатының жартылай финалына жолдама алды. Енді қазақстандық балуан финалға шығу үшін Грузия өкілі Сандро Курашвилимен кездеседі. Бұл белдесу Бейбарыс үшін әлем чемпионатындағы ең маңызды сынақтардың бірі болмақ.

Бейбарыс Ерғали кім?

18 жастағы Бейбарыс Ерғали – Жамбыл облысының тумасы. Ол жасөспірімдер арасында бірнеше халықаралық жарыста жүлдеге ілінген. Спортшы 2024 жылы 17 жасқа дейінгі балуандар арасындағы Азия чемпионатында 80 келі салмақта қола жүлде жеңіп алса, 2025 жылы 92 келіге дейінгі салмақта осы жетістігін қайталаған. Ал 2026 жылы 20 жасқа дейінгі балуандар арасындағы Азия чемпионатында күміс медаль иеленді. Бейбарыс Ерғали Қазақстан Республикасының спорт шебері және халықаралық дәрежедегі спорт шебері атақтарына ие. Жас балуанның тағы бір ерекшелігі – оның отбасы да күрес өнерімен тығыз байланысты. Бейбарыс – Қазақстан құрамасының тәжірибелі балуандарының бірі Әлішер Ерғалидың інісі. Ағасының жолын жалғастырып келе жатқан жас спортшы қазір халықаралық аренада өз мүмкіндігін көрсетіп жүр. Қазақстандық жанкүйерлер енді Бейбарыс Ерғалиден финалға жолдама күтеді. Оның әлем чемпионатындағы нәтижесі ел құрамасының қоржынына тағы бір жүлде қосуға мүмкіндік береді.