Қазақстан әйелдер құрамасы жылдың маңызды додаларының бірі – Билли Джин Кинг кубогының финалдық кезеңінде Елена Рыбакинасыз қалуы ықтимал. Қазақстан құрамасының көшбасшысы сол жақ тобық аймағындағы жарақатына байланысты жарысқа қатысу мәселесін әзірге нақты шеше алмай отыр. Теннисшінің Ахилл сіңіріне қатысты мәселесі қайта ушыққан. Рыбакина 21 тамызда жарақаттың қаншалықты күрделі екенін анықтау үшін МРТ тексеруінен өтеді. Егер зерттеу нәтижесінде тобық байламдарының елеулі созылуы немесе зақымдануы анықталса, спортшының толық қалпына келуіне шамамен 4-6 апта қажет болуы мүмкін. Бұл жағдайда Рыбакинаның қыркүйек айының соңына дейін қажетті спорттық бабына қайта енуі қиын.

    Қазақстан құрамасы үшін бұл маңызды мәселе. Билли Джин Кинг кубогының финалдық кезеңі Қытайдың Шэньчжэнь қаласында 22-27 қыркүйек аралығында өтеді. Қазақстандық команда ширек финалда Испания құрамасымен 23 қыркүйекте кездеседі. Рыбакина – ұлттық құраманың басты көшбасшысы әрі жекелей сында негізгі үміт артылатын спортшы. Сондықтан оның турнирге қатыса алмауы Қазақстанның жартылай финалға шығу мүмкіндігіне әсер етуі ықтимал. Егер Рыбакина жарысқа қатыса алмаса, командадағы негізгі жауапкершілік Юлия Путинцеваға түседі. Сонымен қатар жұптық сында Жібек Құламбаева мен Анна Данилина маңызды рөл атқарады. Дегенмен қазақстандық теннисшінің Билли Джин Кинг кубогына қатысу-қатыспауы медициналық тексеру қорытындысынан кейін ғана белгілі болады. Қазір басты міндет – жарақатты асқындырмай, спортшының толық қалпына келуіне жағдай жасау.